Bu gün sizlərə kitab sevgimdən, kitabların həyatımdakı rolundan danışmaq istəyirəm. Kitab oxumağı sevirəm, bu öz yerində. Oxumadığım günlər mənə elə gəlir ki həyatımın bir gününü yaşamamışam, dərin bir boşluq hissinə qapılıram. Ona görə də çox məşğul olduğum günlərdə belən ən az 10 səhifə oxumağa çalışıram. Bəzən heç kitab oxuya bilmədiyim günlər olur. Vaxt darlığından deyil, sadəcə nədənsə kitabı əlimə ala bilmirəm. Yenidən kitablara qayıdanda oxumadığım günlərə görə böyük peşmançılıq keçirirəm.
Yuxarıda dediyim kimi, oxumağı sevirəm bu öz yerində, amma oxumaqdan əlavə kitablarla yaşamağı da sevirəm. Evin hər küncündə - masada, rəfdə, pəncərə kandarlarında, hər yerdə kitab var demək olar ki... Kitablar arasında yaşamaq çox böyük huzur, rahatlıq gətirir mənə. Əslində bunu son bir neçə ildə kəşf etmişəm. Əgər problemlərim varsa kitab rəfinə gedib bir-iki kitabı əlimə alıb vərəqləyirəm, bəzən altını xətlədiyim cümlələri oxuyuram, oxumadığım kitabdırsa annotasiyasını oxuyuram beləcə bir də baxıram rahatlamışam, hər şeyi unutmuşam.
Məni tanıyanlar bilir ki, özüm üçün həmişə mütaliə siyahısı tərtib edirəm, amma etiraf edim ki, heç vaxt bu siyahılara sadiq qalmamışam. Ya da nə vaxtsa siyahıya baxıb "hə, bu gün bu kitabı oxuyacam" deməmişəm. Bu siyahılara bəzən baxıram, əgər ordan oxuduqlarım olubsa üstünü xətləyirəm və bir gün baxanda hansısa siyahımı tamam xətlənmiş görsəm onda özümü böyük bir işin öhdəsindən gələn insanlar kimi xoşbəxt və rahat hiss edirəm.
Kitab seçimlərim təsadüfü olur, məsələn gecə saat 12-də qərar verirəm ki, filan kitabı oxumaq istəyirəm, çox nadir hallarda oxuduğum kitabları əvvəlcədən planlaşdırıram. Ona görə də, əlimin altında həmişə seçim edə biləcəyim çoxlu kitab olmalıdır. Oxumadığım qədər çox kitab almaq vərdişim də burdan irəli gəlir. Bəzi kitabları alanda bilirəm ki hələ ən az iki-üç il bu kitabı oxumaq fikrim yoxdur, amma ya birdən oxumaq istəyərəm deyə alıb saxlayıram. Hətta bəzən kitablığımda olan kitabların heç birini oxumaq istəmirəm, belə vaxtlarda elektron kitablara müraciət edirəm. Elektron kitablara olan sevgimin bir nədəni də budur - seçim korluğu çəkmirəm, ürəyim istəyən kitabı tapa bilirəm.
Bacardığım qədər çox kitab almağa və bacardığım qədər çox kitab oxumağa çalışıram. Amma nə kitab almağa nə də oxumağa özümü məcbur etmirəm. Aylarla kitab almadığım olur, sonra bir neçə ayda alacağımı iki ayda aldığım da olur. Eynilə günlərlə oxumuram, amma bir gündə iki kitab bitirdiyim olur. Nə zaman içimdən necə gəlirsə...
Bir sözlə kitab oxumağı sevdiyim qədər, onlarla eyni evdə yaşamağı da sevirəm...
Aybəniz Həsənova