Qadin.Net saytının baş redaktoru, yazıçı Xəyalə Muradın “Vanuatu adasının sakinləri” kitabının təqdimat mərasimi keçirildi.
Qadin.Net-in verdiyi xəbərə əsasən, “Parafraz Nəşrləri”nin ikinci nəşri olan kitabın təqdimat mərasimi martın 3-də, “Kitabevim.az” Kitab Evinin “28 May” filialında, saat 14:00-dan 16:00-dək keçirildi.
Təqdimat mərasimində Xəyalə xanımın qələm dostları, oxucular, Qadin.Net-in redaktor heyəti və blogerlər iştirak etdilər.
Qeyd edək ki, 312 səhifədən ibarət macəra romanının redaktoru yazıçı, jurnalist Cavid Qədir, korrektoru jurnalist Nuranə Abbasova, dizayneri Vasif Bağırovdur.
Kitabın məzmunu və müəllifinin yaradıcılıq yolu haqqında naşir Cavid Qədir və Kitabsevərlər İctimai Birliyinin rəhbərlərindən olan Fariz Bayramov öz ürək sözlərini dedilər. Yazıçı Xəyalə Murad "Vanuatu adasının sakinləri" romanının dilogiyanın ilk hissəsi olduğunu xüsusilə vurğuladı. Romanın "LenFilm" kinostudiyasının elan etdiyi beynəlxalq ssenari müsabiqəsində tammetrajlı filmlər kateqoriyası üzrə yer tutduğunu qeyd edərək, oxucuları maraqlandıran sualları cavabladı.
“Vanuatu adasının sakinləri” adanın “doğmalaşdırdığı” yadlar, pulun əsir etdiyi insanlardan bəhs edir.
Dostluğun düşmənliyə, güvənin güvənsizliyə, inamın inamsızlığa, yaşamın ölümə apardığı üç həftəlik “istirahət”də bir-birinə yad on dörd nəfər hava limanında ölüm müqaviləsi imzalayır. Üç həftə ərzində gözdən uzaq adada sağ qalmağı bacaran bir nəfər on milyonun sahibi olacaq.
Rəqibə çevrilmiş bu adamların taleyindən bəhs edən macəra dolu roman oxucusunu gözləyir!
"Vanuatu adasının sakinləri" kitabının satış yerləri:
"Kitabevimaz" -28 may və Nizami filialı,
"Bookzone"kitab evi
"Xan xəzinəsi" kitab evi
"Zəka" kitab evi
"Esprit" kitab evi
