Xoşbəxtlik... Nədir xoşbəxtlik? Sevib sevilməkmi, pulmu, təhsilmi, ailəmi, vəzifəmi? Nədir, nədir xoşbəxtlik? Bir məqalədə oxudum ki, əslində insan bir ömür boyu xoşbəxt ola bilməz və yaxud xoşbəxt həyat sürmək mümkün deyil. Xoşbəxt an, xoşbəxt gün, xoşbəxt dəqiqə ola bilər yalnız. Bu bir psixoloq fikridir və psixoloq baxışıdır. Bəs mənim üçün, bizim üçün nədir xoşbəxtlik? Həqiqətən də xoşbəxtlik yalnız hansısa dəqiqə, gün ola bilər? Bəs insanın yaşadığı sevgi, məhəbbət xoşbəxtlik deyil?
Bir-birini sevmək, ona diqqət və qayğı göstərmək, onu hər zaman sevindirmək. Bütün bunlar xoşbəxtlik deyilmi? Bəs illərlə xəyalını qurduğun ailəyə sahib olmaq, sevdiyin insanla ailə həyatı qurub,illərini onunla paylaşmaq, yaxşı, pis nə varsa bir yaşamaq, mehriban yaşamaq xoşbəxtlik deyilmi? Bəs övlad sahibi olmaq? Sevib seçdiyin insandan övlad sahibi olmaq, o övladının ata, ana deməsini eşitmək, addımlarını görmək, həyatda sahib olduğu uğurları görüb fərəhlənmək xoşbəxtlik deyilmi?
Əziyyət çəkib, gecəni gündüzünə qatıb, oxuyub, xəyalını qurduğun Ali məktəbə daxil olub, illərlə oxuyub bilik qazanmaq xoşbəxtlik deyilmi? Çalışıb-çapalayıb istədiyin peşənin sahibi olmaq və yaxud irəliyə doğru addımlayıb, vəzifəyə yiyələnib daha da bacarıqlı olmaq xoşbəxtlik deyilmi? Atalı-analı, mehriban bir ilədə böyüyüb, boya-başa çatmağın özü bəs xoşbəxtlik deyilmi?
Bilmirəm, bəlkə də mən ümumi baxış olaraq hesab etdim xoşbəxtliyi. Bəlkə də mənim xoşbəxtlik hesab etdiyim sadəcə mənim fikrimdə, düşüncəmdə olan xoşbəxtlikdir. Bəlkə də psixoloqlar haqlıdır, onların fikri doğrudur, bəlkə də mənim...
İndi siz deyin, məqaləmi oxuyub fikrinizi yazın, nədir xoşbəxtlik? Kimdir xoşbəxt? Nədədir xoşbəxtlik?